لا تقطفي. .بقلم الشاعر. .صبحي ياسين

.....  بيوتنا القديمه .....

...........................

عينيا  مالها مدغششه
شايف  طشاش
البيوت مش هيه هيه
والأسامي مش عفيه
فين  زمانك  يابهيه
فين حميده وفين سنيه
حنينا لبيوتنا القديمه
فين عزيزه وفين كريمه
فين سعيده وفين نعيمه
لما كنا في يوم حبايب
والمصطبه لمه القرايب
غدوه حلوه  بلقمه ناشفه
وجبنه حادقه وقعب رايب
كنا ننده  ع اللي غايب
أو نشيل  لغيابه  نايب
لسه  فاكر  ستي  حمده
كات وتد للعيله جامده
كات تنادي وامي نايمه
يابنتي راح  القمر
قومي عجينك خمر
وتصحى تحمي الفرن بدري
للمشلتت  والمعمر
والجيران حواليها تسهر
كات قلوب الناس عمار
والكلام عفه ووقار
كل كلمه وليها قيمه
كات وشوش الناس وسيمه
والكبير كان له مقام
والخصام كان يوم وليله
والهموم ماكانتش شيله
كنا لمه ف حضن عيله

كنا لمه ف حضن عيله
...............................
بقلمي الفلاح الفصيح
معوض حلمي
منشأة بطاش
تمي الأمديد
دقهلية