قصيدة بعنوان........ كانت ملاك
كانت ملاك م الجنه
بتسعف المصابين
صابها رصاص الغدر
اللى كوانا سنين
ماتت فينا الشهامة
وعملنا مش شايفين
صابنا الوهن والطمع
وخسرنا دنيا ودين
رازان يابنت بلادى
فى جنة الخالدين
عمر الوفا مايموت
هنعيش سنين فاكرين
أبطال ضحوا بدماهم
علشان نكون عايشين
كتر الخلاف دمرنا
خلانا مش قادرين
بس اللى غاب راح يرجع
رب العباد هيعين
ضحكوا علينا زمان
قالوا حقوق إنسان
وإحنا اللى مصدقين
خربوا بيوتنا وحياتنا
وشعللوا الميادين
ولا رحموا يوم انسان
ولا كانوا منصفين
عالم زى الديابة
على كل لون عايشين
بيسلبوا الغلابه
وبيقتلوا المساكين
لا شوفنا ليهم أرض
ولا كانوا يوم ساكنين
حبة كلاب ساعدوهم
ع النصب والتمكين
نهبوا أرض الغلابة
وعاشوا محتلين
شجر الزيتون بيبكى
على أهلة المخلصين
والاقصى أسير بيصرخ
من ظلم المجرمين
والطفل ف عينه ضلمه
بيدور ع الحنين
مش لاقى حتى ضمه
تروى عطش السنين
كلمات الشاعر محمد ثروت عبد الحفيظ