فيكي يا دنيا اللي مايتقال
فيكي الواقع أصله خيال
فيكي الخيبة وفيكي الوكسة
فيكي يمينك خاطفه شمال
فيكى الراكب راكب ماشي
وفيكي الماشي ضاربها طناشي
فيكي متاهة بيت النداهة
ندهت تايه راح ولاجاشي
فيكي النخلة بترمي التمرة
ياتصبح عجوة ياتصبح خمرة
فيكي وفيكي إللي مخليكي
بكل صراحة جهنم حمرا
فيكى ليلاكي والمجنون
فيكى دليلة وفيكي شمشون
فيكى طاووسك نافش ريشو
وفيكي عالنار سكر ولمون
سبعك مات في الصحرا جعان
وكلبك كل لحم الغزلان
وعالم فرشه يادنيا تراب
وفرش العالمة حرير وستان
فيكى الكتكوت والحداية
ووش مراية وقفا سلاية
عندي انا حق يادنيا قوليلي
ولا يادنيا أنا برمي بلايا
الدنيا. ..
لا انت بترمي بلاك ولا حاجة
الحدوتة ماهيش محتاجة
أنا قصة فيلمك وانت بطلها
بطل بقى يابطلنا سذاجة
بقلم طارق السيد