ما تسأليش
----------
بقلمي - عادل عمران
-------------------
ما تدوّريش على حكايتي
وما تسأليش أنا ابقى مين
حكايتي انتهت ولا ابتدت
على بداية طريقي الحزين
معاكي بين الوجوه
حسيت اني باتوه
ومشيت طريق مانيش فاهمه
ولا كنت يوم حلمت برسمه
ولا قولته حتى ف كلمتين
ما تدوّريش على حكايتي
وما تسأليش أنا ابقى مين
أنا اللي حبك حب جنون
أنا اللي راسمك في العيون
بكل شكل بكل لون
كنت ملامحك
شجرك وطرحك
وربيع فرحك
والنن والرمش والجفون
بس يا خسارة عليكي
قلبي مات على إيديكي
وانتهيت انا بيكي
يادوب في لحظة مش لحظتين
ولا عرفتي إيه حكايتي
ولا عرفتي أنا ابقى مين
أتاريني كنت باحلم
وحلمي رافضاه السنين
ما تسأليش انا ابقى مين
ما تسأليش انا ابقى مين