دوِّبني فيك .......أكتر واكتر
يابو ضحكة أحلي من السكر
والعب ف قلبي ....واتمختر
واضحك علي.... قد ماتقدر
دوبني فيك يابو. وش بريء
النظرة ليك ......بتبل الريق
والرأي واضح كده وجريء
دمك خفيف....... لما تكشَّر
كفك ينونو ....طعم وجميل
واللون سمار من لون النيل
والشفة .....موال المواويل
والسنتين... أخطر واخطر
سمَّعني يللا صوت الكروان
أنا قلبي بيك .فرحان فرحان
دا الورد منك ...بقي غيران
ما انت العبير .مسك وعنبر
قوم يللا تاتا ,,,,,وماتحبيش
وخطوة خطوة كده بشويش
واديني واحدة ...سنترفيش
ع النغزتين ..علشان أسكر
دي عنيك بتنطق بالإحساس
وعيوني دايما.. ليك حراس
بخاف عليك من عين الناس
قلبي عليك .....سمي وكبَّر
دوِّبني فيك أكتر واكتر
سامية سليمان