العربى
@@@
اسمه العربى
وشهرته لهيطه
الميه مالحه
والوشوش كالحه
عقد الدوبار
فى الشبكه بشنيطه
والعنكبوت
بيقلده برجليه
فى السقف
رابط لابنه مرجيحه
إبنه الصغير
عينو باصه عليه
طبليه واقفه
وسانده ع الحيطه
ع الحيطه والمسمار
لاسه وبرنيطه
كذا فله متعفره
وتحت السرير نايمه
هى اللى بنتخلى
الشباك عايمه
فوق الجبين
رسم الزمان موجتين
والموجه منها
بتحكى صبر سنين
البحر سايب
تحت عينه أخاديد
والبياض باين
بين التجاعيد
الملح ملس له ع الصلعه
لمبه جاز
جنب الشباك والعه
ريحة السمك
جايه بريحة الزيت
فايقه قاعده
مقرفصه بتقلى
والهون على الجمبرى
نازل وهات تخابيط
على راسها قامطه
ملعلعه وفاقعه
والواد على كتفها
تكتك من الصقعه
العربى جاب
م المخله لفة خيط
نهنه وفرت
من عينيه دمعه
والسقا جاى
يرضع الزلعا
ماشى يشرشر
فوق حصير البيت
السقا خد
بدل الفلوس سوبيط
بنت بيضه صغيره
فوق الشباك قالعه
سلك إيديها
ولسه مش طالعه
يا صاحب المجداف
والقلع والدفه
ياللى فتحت إيديك
وفركتها بتفه
ياللى مابين الموج
تظهر وتتخفى
ياللى بقماش مبلول
لافف عليك لفه
ياللى الخطر حواليك
بيتقل الدفه
ياللى انت مش بايديك
تبرد وتتدفى
والعدل من حوليك
بيميل الكفه
يا عربى نعمل ايه؟
لما هتتوفى
وان مت وعليك دين
امتى هايتوفى.
