من ديوان نجوم من همس مصر
ـــــــــــــــــــــــــــــــــــــــــــــــــــــ
المراكبي // إبراهيم معوض
يا سمرة من ترابك لونى
يلا نفضي هدومي
ومد إيديك وخديني
وساعديني أعيش يومي
يمكن اكون لك نوح
وتكوني ويايا ف المركب
أو حتي لساني يبوح
وشعرك علي كتفه بيتسرسب
و أقدر أبكي وانوح
واعيش مجروح
لوالدنيا عليك تتكركب
ياريت الدمعة ف عيوني
تتغطى ورا الأسرار
ف تشوفني عيون الناس
قوي..... جبار
ألم الشمس ف كفوفي
وأمحي م النهار عفار
والليل يجري ما يلحقني
فيرمي قمره قدامي
يخنق شمسنا ويمضي
شهاده موت لأحلامي
برغم القوة كان أقوي
بيكسب قوته مني
وبرغم الضعف
أديني بجري ف الملكوت
واستني ليالي تفوت
مبتفوتشي
والشمس مخنوقة على كفي
وبقجه قديمه على كتفي
ماليها الخوف
ورغم الشوف منيش شايف
نهار زايف
والشمس اللي عامله أنزوحه
بحته هدمه مطروحه
ملاها سواد
فبالكاد
يادوب هجري وهتعثر
واقع واقوم واتمرمط
وألم ترابك الأسمر
يمكن ف يوم ترضي
وتديهم شعاع أخضر
يسبوني أكمل جري
ــــــــــــــــــــــــــــــــــــ
إبراهيم معوض
