السلام عليكم ورحمة الله وبركاته
اليكم الحلقة الرابعة من حكايات خالتي بامبه
بعد السلام ما يحلى الكلام إلا بعد الصلاة على الحبيب محمد عليه الصلاة والسلام
أنا النهاردة يا أحبابي مكسله شويه مش هاروح عند حد من الجيران لكن هاحكي معاكم شوية علشان بصراحة رمضان السنه دي متغير اوي حساه غريب ومش لاقي مكانه وتايه عن عنوانه لا لاقي بيته ولا سكانه حتى الناس غريبة اوي فيه كل اللي يعرفوه عن رمضان صيامهم طول اليوم والفطار المغرب و صلاة التراويح مافيش حد بيتزاور ولا حتى موائد الرحمن قليلة اوي مش زي زمان كنا في كل مكان تلاقي موائد الرحمن بين كل خطوة وخطوة تلاقي مائدة للغلابه واللي على سفر والمتغربين في الفطار والسحور كنت تحس ان كل الناس اللي على موائد الرحمن كلهم بيتآلفوا ويتسامروا وكأنهم قرايب وعارفين بعض وبيكلوا مع بعض عيش وملح واذا اتقابلو مره تانية في اي مكان يسلموا على بعضهم ويسألوا عن احوال بعض كان فيه محبة بين الناس وبعضها
حتى المسحراتي بقى على الموضه هو كمان بيخبط بالطبلة يلف الشوارع وخلاص بيأدي مهمة ياخد عايها أجر آخر الشهر فين المسحراتي اللي كنا احنا يا كبار قبل الاولاد الصغيرين نفرح به ونحب نسمع لحكمته وامثالة وكلامه الجميل ووقفته تحت شباك كل واحد وينادي عليه بأسمه ويقوله أصحى يا نايم وحد الدايم رمضان كريم وينادي باسماء المعارف والاحباب الجيران والقرايب في كل حارة وفي كل شارع حتى العيال اللي كانت تلف وراه بالفوانيس وتغني بغناها الجميل فين المسحراتي اللي كنا بنحب نسمعه من سيد مكاوي ايام زمان الجميلة راحت ايامها و مافيش اي مظاهر لفرحتنا برمضان حبيت افضفض معاكم لاني زعلانه اوي مش عارفه احنا اللي اتغيرنا ولا ايه اللي حصل في الدنيا.
........ ياعيني عليـــا........
#بقلم_حنان_محمدع
