لا تقطفي. .بقلم الشاعر. .صبحي ياسين

بحور الشعر ( قليلا من الفكاهة )
مطلوب مني أسافر
بالغصب في بحر الوافر
غصباً عني سافرت
وفضلت أعوم وأعافر

ورجعت أوام للبر

ماسك في إديا تناص
من بعد ماذوقت المر
وشربت كاس المحتاس
قالوا إني من المفروض
لازم أدرس فن عروض
قلتلهم مابحبوش
قالوا أما صحيح نمرود
طب إرجع تاني وشارك
في سباق بحر المتدارك
أنا قلت دا بحر طويل
قالوا الله يذيد ويبارك
قلت أنا شاعر عامية
وبحوركم صعبة عليا
قالوا إنزل بحر الرمل
وخش لجوّه شوية
تلقاه بحر مديد
وهزجه بسيط ومفيد
أنا قلت كلام معقول
ولسة يادوب أنا هنزل
لقيت فعولن بتغرق
وإللي مغرقها فعول
ياخليل يابو أحمد ليه
أغرق في بحورك ليه
والبيضاوي والأخفش
عايزين مني أنا إيه
أنا واد بكتب كلمات
من بحر الظلمات
مشهود له بالحكمة
والعبرة في النهايات
وقليلا م السخرية
مع تحويل الدفة
أطرطش حبة مية
على كداب الزفة
وبكل سلاسة وخفة
أكتب ف سطور من نور
بحروف عسلي إللي إتصفى
وتكشف في المستور
سامحيني يابنت الفصحى
أنا إتربيت في الفسحة
وساكن شق في حارة
بنام ع العامي وبصحى
لو يسمعني الذبياني
كان يقطع ليا لساني
ويحجزلي مع المجانين
عنبر مخصوص علشاني
بقلم طارق السيد