مر الزمان ''شعر شعبي تونسي''
=======
مر الزمان تعدى
و العام تابع عام
و الحزن عندي باقي
عامل ديار مقام
رتب خيوطه سدى
لا جيت لا طليت
و لا ريت الخيال تعدى
استنيت ما مليت
لا جاني خبر ارجوعك
و لا جاش منهو رده
و ظنيت بعد اعوام
ننسى وجع لايام
و يتبدلو يتغيروا
نسمع جرس الباب
لكن احساسي خاب
و الحزن ما فارقني
وطن نصب خيام
وطن احتل دياري
كي النار باقي ساري
ياكل هشيم احساسي
عاند معايا قاسي
لا برادته دموع
و لا لينه تخمام
و سالت ما مليت
من عاد بعد غياب
ريتوش خويا الباهي
لا حد رد جواب
و بكيت زدت بكيت
و بكيت حيط البيت
و حتى الثنية بكت
و متذكرة ما نست
اخر زيارة كانت
و سمعتها تسالني
و كان السؤال ملام
سالت عليا تلوم
ارحم دموعك توب
و اصبر على المكتوب
و ارفع ايديك الفوق
ربي الكريم العالي
عنده الرجاء ما يخيب
و بكيت وقت سجدت
و عند السجود ادعيت
الله يرحمك يا حبيب
الله يرحمك يا حبيب
الله يرحمك يا حبيب
===============
تيحاني محجوب الصويعي/ تونس
الشاعر تيجاني محجوب الصويعى يكتب
14 hrs
همس مصر للثقافة و...