السلام عليكم ورحمة الله وبركاته
وحكايات خالتي بمبه الحلقة العاشرة
تعالو نشوف هتحكي لنا ايه الليلة
*********
مساء الخير على الحبايب اللي حاضر منهم واللي غايب
رمضان كريم مبارك عليكم يا ناس ياطيبين ياللي لحبل الوداد متماسكين ومتواصلين بتوحشوني وتوحشني لمتكم الجميلة وحكايات نسمعها لها العجب
ناخد منها العبر ونتعظ ونعيد حساباتنا مع نفسنا اكيد كلنا مش ملائكة وكلنا بنخطأ وخير الخطائين التوابون
انا بقولكم الكلام ده ليه والله له سبب واذا عرف السبب بطل العجب
*****
والله مش عارفه اتكلم ازاي واقول ايه لكن هاحكي الحكاية زي ماشفتها وسمعتها
امبارح بعد ماسبتكم بالليل قلت اصلي ركعتين لله وانام شويه قبل السحور
بس خلصت الصلاة وسمعت الجيران اللي قصادي بتكلموا بصوت عالي
وسمعت الست بتقول لجوزها انا مقدرش استحمل امك هي ليه قاعده معانا ماتروح عند اخوك التاني ولا اولادها البنات هو ليه احنا اللي شايلين همهما لوحدنا
يقوم الشهم جوزها بدل ما يلطشها قلمين على بؤها ويقول لها دي امي انا اشيلها فوق راسي وتقعد جوه عيوني واذا ماكنش عجبك اتفضل اخرجي بره البيت انتي
لقيته بيقول لها ماتزعليش يا حبيبتي انا هاخدها دلوقت واروح اوديها عند اختي تقعد عندها ونرتاح من قرفها
انا اتصدمت من اللي سمعته الندل بيقول الكلام ده عن الست ولدته لمراته طب وازاي نراته تحترمه وتأمن على نفسها معاه اذا ماكنش فيه الخير لامه هيكون فيه خير لزوجته
المهم شويه سمعت صوت باب الشقه بتاعتهم بيتفتح ويتقفل جريت على البلكونه لقيته واخد امه بشنطة هدومها وفعلا رايح يوديها عند اخته
الست صعبت عليا اوي بس قلت اكيد بنتها هتكون احن عليها من الواد ابنها ده
صبحت النهاردة الصبح وفي نيتي لو صادفت الوالد ده انا هابهدله واقوله كلمتين في جنابه هو مراته
واعرفهم ان كما تدين تدان وبكره اولادهم يعملوا فيهم كدا زي ماعمل في امه وسمع كلام مراته
المهم لسه بافتح باب الشقه وهاطلع لقيت الست وبنتها طالعين على السلم وبيخبطوا على بابا شقة ابنها
استغربت اوي وكمان البنت شايله نفس الشنطه ياترى جابت مامتها تاني ليه
المهم نزلت رحت السوق استقضيت مستلزمات بيتي ورجعت
سمعت صوت عالي جاي من الشقه بتاعتهم
وسمعت الولد بيقول لاخته انتي جبتيها تاني ليه مش اتفقت معاكي امبارح انك هاتقعدي امك عندك علشان مراتي مش طيقاها وعملالي مشاكل بسببها
البنت بكت وقالت له ان جوزها رفض وقالها انا مش قادر اكفيكم مصاريف هو انا هاصرف كمان على امك اختاري عشتك معايا كوم وامك تقعد معانا كوم تاني
يعني عايز الست ترجع تاني عند ابنها ومش عايزها تقعد عنده
البنت قالت لها خلاص الصبح هاخدها اوديها تاني عند اخويا وراحت جيباها وجايه
المهم البنت سابته يزعق واخدت نفسها ومشت وسابت امها عنده
اتصل على اخوه وحكى له وقاله تعالى خد ولدتك تقعد عندك شويه اخوه اعتذر وقاله انه مش موجود في الشقه لاهو ولا اولاده لانهم مسافرين زيارة عند اهل زوجته
اتصل على اخته التانية برضه اعتذرت بان زوجها مش هيوافق وان اولادها بيمتحنوا ومش فاضيين في الفترة دي
الست مراته بئا وقفت له وحطت ايديها في جنبها وقالت له هاتعمل ايه يا سبع اختار يانا في البيت ده يا امك
قالها انا هاخدها اوديها دار للمسنين ونرتاح منها
طبعا الست لا قوة الا بالله على حالها بتبكي على عمرها اللي راح وضاع وهي بتربي في اولادها وشافت الويل وسهر الليل علشان توصل بيهم لبر الامان وتشوفهم احسن ناس في الدنيا وفعلا الواد اللي بحكي عنه ده للاسف مهندس واخوه دكتور واخواته البنات واحده محامية والتانية مدرسة
وفي الاخر وبعد وفاة ابوهم وامهم تعبت من شقاها عليهم وبتاخد علاج وست لا حول لها ولا قوة ست بركة كفاية دعوة منها لابنها او بنتها ترفع ايديها لرب السما تدعي لهم بكل الخير والطيب وهما دلوقت بدل ما يقدموا لها جزء من جمايلها عليهم ويقعدوا تحت رجليها ليستنشقوا رائحة الجنة للاسف مش قابلينها ولا عايزين يخدموها او يستضيفوها في بيوتهم
اللي زود الهم والغم انه اخد امه يوديها دار المسنين للاسف ماقبالوها لانها لا تتوفر فيها شروط قبولها في الدار
تعرفوا عمل ايه الولد العاق ده علشان مايرجعش بها البيت لمراته اصل تغضب عليه وتسيب له البيت وتمشي
اخدها بالليل الساعة الثانية مساء وتركها في شارع بعيد جدا عن بيتها او بيته اللي هو في الاصل بيتها هي تخيلوا رمى امه في الشارع
سربها زي القطط في الشارع بجلبية البيت وشنطة بلاستك فيها علاجها وهدومها
الست قعدت في الشارع على الرصيف تبكي لوحدها عدى عليها شاب ربنا وضع في قلبه الرحمة والشفقة على الست دي وقف بعربيته ونزلها سألها انت قاعده كدا ليه يا ماما ممكن اوصلك لاي مكان عيزاه
الست بكت وحكت له على اللي حصل الشاب بكى وقال لها طيب يا ماما مش هاينفع اتركك في الشارع وفي الوقت ده طيب تعرفي عنوان ابنك او رقم تليفونه الست قالت له لا بلاش هتوديني له هايرميني في الشارع تاني خليني في الشارع وربنا مش هينساني
المهم الراجل اخدها وقال لها تعالي يا امي انا هاخدك تعيشي معايا انا وزوجتي وامي واولادي في شقتي وهتكوني معززة مكرمة
على فكرة دي حكاية حقيقية ويمكن يكون حد منكم سمعها على التليفزيون والشاب اتصل بالشرطه والتليفزيون علشان طبعا دي مسؤولية كبيرة بس علشان يعرف اولادها انها موجودة عنده اذا حب حد من اولادها ياخدها عنده وهو بيبكي وبيقول الست دي ام لاربع ابناء متعلمين ومتربين احسن تربية وفي الاخر يرموها في الشارع
شفتوا يا ناس وصلنا لحد فين في عقوق الوالدين
فين برالابناء لالاباء والامهات شفتوا وصلنا رجة التبلد وتجميد المشاعر وقسوة القلوب
حقيقي حاجة تقطع القلب وتوجع اوي اعرفوا ياناس الا عقوق الوالدين ربنا مش بينتظر لقيام الساعة علشان يحاسب العاق لا ده بيعجل بحسابه على حياة عينه علشان يتعمل فيه زي ما عمل في امه وابوه ويعترف ويقر بنفسه ان ده اللي سبق وعمله في امه
والست هانم اللي مش بتطيق حماتها انت بكره تكبري وهاتبقى حما انت كمان وهايتعمل فيك واكثر من اللي انتي عملتيه في حماتك اللي هي امك وجابت
وجابت لك راجل طول وعرض علشان تقفي تتحكمي وتقول له يانا يا امك هايجي ابنك ومراته تقوله نفس الكلام ده كما تدين تدان اتقوا الله واحسنوا لمن تعبوا من اجل راحتكم وكل حياتهم كانوا وهبنها لكم عن طيب خاطر وبكل تضحية ورضى منهم في سبيل اسعادكم
اه يا ناس بجد تعبت..... يا عيني عليا.........
#بقلم_حنان_محمدع
