موثقة على مدونتي الشخصية
......... يوسف .........
.............................
ياعزوتي وعزي
هزي الهلال هزي
يالا إنهضي وفزي
طلعي الدبابير
قومي إبعتي فرعون
يوسف رموه في البير
كل الكفف مالت
معادش لينا كيل
حتى الكتاف شالت
هدت ياطيبه الحيل
يوسف يابو الكرمات
قلت العجاف سبعه
وانا عيشتها سبعات
وسبعه ورا سبعه
العمر عدى وفات
وبقيت رفات
فين السنابل ..؟
طرحها م الغلب مات
فين السمان ..؟
وفين زمان المعجزات
بانادي كل الآوليا
وباكنس العتبات
السجن مش للأنبيا
دا الوعد والمكتوب
والرؤيا بتقول لنا
فعل المعاصي ذنوب
قلب النبي كان نقي
بين العباد كان تقي
يسمع كلامه الشقي
ينسي الذنوب ويتوب
بعدله ساوى والكفه
بعت قميص العفه
رجع نظر يعقوب
وليه نظركي طناش
ميل ولاشفناش
ولاشافنا حتى طشاش
صدك يشق قلوب
وانا ابنك اللهلوب
موهوب لكن مغصوب
مغلوب على أمري
كان الهنا عندي
مالوا على زندي
الميله جت جامده
ياهمتي الصامده
لإمتى هاتعاندي
وتعدي بالعافيه
والعافيه كات عندي
وعندي إنجازي
ياعم ياغازي
ياناسي غمازي
غمزلي شديته
طلع لي عكازي
ألغازي مدفونه
لهجمه ملعونه
مجنونه بالمره
ياطيبه ياحره
ياعفتي ودره
المره لو منك
تحلو ميت مره
طب ليه كلاب بره
بتهد في عينيكي
وانتي اللي بإيديكي
طبطبتي / هنيتي
وتداري مستورك
وليه وحوش جوا
هايجين كما النوا
لا نخوه ولا مروه
بيتاجروا ف شعورك
وشعورك الشيله
صفصافه ضليله
ع الترعه تتعايق
ياماسك الدفه
وبالك الرايق
يادمك الخفه
حود على بابي
م الخلق باتخفى
وانا نفسي أتدفى
البرد جاي سايق
وشاقق الجته
بقينا ميت حته
والصدا عته
عتت مناديلي
ياصبر عديلي
اسمع مواويلي
قنديلي ليه مطفي
رغم الوفا قطفي
خادوه ولاد الإيه
ماتحن حبه يابيه
طمن فؤادي لاغيه
حواريا سهرانه
تايهه وقلقانه
ياستنا الشايله
وخايفه ع العيله
ماتقلت الشيله
وكتافك الهايله
جامده
ماهيش مايله
حارسه خطاوينا
شوفناكي بعنينا
لعنيكي حنينا
من مينا لاكتوبر
ربيتي واد سوبر
طلع الولد فارس
وحارس السكه
ياسارق الدكه
ياقلبك السكه
صفي بقى النيه
ورد لي عطفي
أنا عطفي حنيه
امي اللي كات غيه
بتصبه في عينيا
لساها بتصبه
نهر الوفا هيه
وهيه بنيه
وانا ابنها العتره
وماشي ع النيه
وماشي ع النيه
............................
بقلمي الفلاح الفصيح
معوض حلمي
منشأة بطاش
تمي الأمديد
دقهلية