لا تقطفي. .بقلم الشاعر. .صبحي ياسين

★هو هوايا و فيه دوايا ★

الحرف من العاطي عطية
عطاه لنا الله هدية
نوصيك يا خاي وصية ... سِر عْمل به مزية
ربّيه و صونو و دير فيه النية
عنقو و حضنو و بغيه... و اخدم به قضية

سالوني عن حرفي... قلت :
حرفي حقيقة خالي من وشاية
طاهر و نقي مبرّي من خطايا
حرفي صافي... وافي...دافي.. كافي...
يشفي و يعافي
و حين يثور ما تصدّو عوافي
حرفي ... درتو عنايا
يلا ناديتو يسمع نْدَايا
يفهم سري...و يلْغَا لْغَايَا
فالفرح قريب...و فالشدة حدايا
ما يحتاج وكيل...لا وسيط لا وصايا
و فين ما مشيت ناخدو معايا

حرفي بدمي مرشوش
من عرقي و عروقي محشوش
ثامر ما مفشوش
في كتابي مفروش راكب العروش
ما مخبوش ما مغشوش
ما فيه زواق ما مربي ف فشوش

حرفي نسجتو بلون هوايا
الوانو تتبدل بحال وجه المرايا
ما عليه قشور ما معنّي ب نواية
لكن بالنسبة لي...
هو گمرة...مضوية سمايا

فيه دوايا... فيه هنايا..
فيه الدمعة الباكية معايا
حرفي سجايا ...
جود و كرم بوفاية
شكوة فايضة بشوقي و شكايا
ظاهرو قصيدة... و باطنو حجاية

حرفي
ما محتاج تعلام
ما محتاج كثرة قراية
تارة يشكي... تارة يبكي
و تارات يجيب الضحك بلا نوايا

حرفي رشقة
ف وثيقة شهقة
درتو حلقة.. ف رواق الورقة
و شكل الورقة ما قرفية و لا زرقة...
ما تقبل دهين... ما تعوم ف مرقة
نهديه نقى... ف كل ملقى

حرفي صيحة
صادقة فصيحة..
من صهد الگلب خارج صريح
لعدويا نكاية... و لحبيبي غناية
مقفي و مسقي من ريح شدايا
لفاظو آية... عالي راية..
باين واضح... ما مخبي خبايا
قياسو ماية.. نظامو غاية
منقي معزول و خالي شظايا
هو هوايا... و فيه دوايا
الغشيم تخطاه... و الفهيم غناه معايا

يزيد علوي اسماعيلي