لا تقطفي. .بقلم الشاعر. .صبحي ياسين

(همس الماضي)
همس الماضي في ودن الحاضر
قاله تعالى وشوف ويايا
فن جميل قعدة على النيل
غزل المواويل على شط قنايا
شعر أبو نواس أدب الخيام
مع طه حسين ويا الأيام
ونجيب محفوظ حقي وإحسان
وعمنا نجم وشيخنا إمام
شكوكو و سمعة بيجو وأبو لمعة
ووقت عصاري وليلة الجمعة
و رق و عود وسبوع مولود
مع دقة هون على قلة وشمعة
وصحبة وأهل وجيرة وعشرة
ولقمة هنية أبرك من عشرة
ولب وترمس فيلم السهرة
وبعد الفيلم نشوف النشرة
واللي بقوله دا قبل النت
وقبل عقول الناس ما تشت
وكله بقى يمثل على كله
البت اللارج الواد الفت
أما الشات والشات بالذات
رجالة ستات و ذوي إحتياجات
جالها الإحباط من كتر الفرك
جاب إلتهابات من تحت الباط
أدي أحوالي ودا كان حالي
شوف أحوالك من أحوالي
و شد في حيلك وإعدل ميلك
هتحقق كل إللي في بالي
لو مش عاجبك ضم حواجبك
كرمش قورتك ماهو من واجبك
برضو تكرمش لما تلاقي
سيادة الجن الأحمر راكبك
مابقولكش في راسك طاطي
ومعنى كلامي ماهوش مطاطي
لا أنا قصدي إني أشوه صورتك
ولا قصدي أخدك تحت بطاطي
أنا لو منك أجيبلي مرايا
أشوف قدامي وأبص ورايا
وأحدد إيه المفروض يبقى
أحشر مناخيري في كل حكاية
بقلم طارق السيد