عنوان القصيدة
(التوهه)
في المفتتح
انا ميت لكن بتكلم
بتألم ومحدش سامع
انا جاهل لكن بتعلم
بتيمم والمركب جامع
انا زي غريق نفسه ف ميه
محتاج لرفيق عزلتي نيه
انا اصلا اعمي ومش شايف
انا شايف والناس مكفوفه
انا عارف متيقن جدا
لسيناريوا وفكرته مألوفه
انا خايف ابقي مجرد ناي
لالحان م الاول معزوفه
انا واثق جدا من نفسي
متردد فكرتي مهزوزه
انا خايف اطلع مش شايف
والناس سنداني ومكسوفه
عضم القصيد يوحي
علي انه سهم سريع
كات وجهته روحي
والعقل وضعه مريع
تايه مابين نوحي
شايف خريف وربيع
عاجز يقول بوحي
والعله مين او فين
ياللي انت غاوي الفهم
فكر هتطلع مين
هل انت اول حد
ام حد م التانيين
ضحك الصحاب والسهر
ماجبرش قلب حزين
قطر الحياه ببهجته
قضبانه كات سكاكين
والارض ليه روحك
تنزف مكانها سنين
بتسرسبك كالخيط
لو تلحق الباقي
تعرف هتمشي ل فين
جود وعيش واحلم
ليه ترضي بالترتيل
دا العمر ف الزايد
روحك تهيش ياعويل
جمر القلوب قايد
قلبك كما التماثيل
عقلك دوام قايد
صعب القليب هيميل
دمع العيون قايد
مايفك غير بالسيل
كل اللي كان قايد
محفور ف صدر هزيل
آه يالمطر كايد
لو تشفي قلب هبيل
القلب كان رايد
لكن عقل قبيل
دبر وكان كايد
قتل اللي كان له خليل
يارب جاي ندمان
جايلك بضهر تقيل
عقل البشر غلبان
عاجز عن التأويل
توب القلوب جبران
مايعريهوش غير كسر
جود الكريم احسان
ماتسعش ليه موازين
لون روحي بقي بهتان
يارب قلبي عليل
عشمان ف نظرة رضا
تبقي لطريقه دليل