فئة الشعر العامى
تنطق بصيغة المؤنث
عشت بأحلم ب السعادة
لما عينك جت فى عينى
كنت فاكره الحب جنه
وان قلبك كان شارينى
واتولد جوايا شوق
رغم بعدك كان كاوينى
كان شاغلنى حلم واحد
ان قلبك مش ناسينى
وان مهما بعدت عنى
بكره شوقك هينادينى
كنت بأستنى ف رسالة
أو جواب منك يجينى
يبعد الشك اللى عايش
واللى صار بعدك عامينى
قول بحبك ليه ناسيها
يالا قول حسسنى بيها
رجع الفرح اللى فيها
واللى كان وياك مالينى
هان عليك الذكرايات
واللى بينا ف لحظه مات
ليه بتبعد من سكات
ليه فى نار الشوق رامينى
كلمات الشاعر محمد ثروت عبد الحفيظ