مجاريح
مجاريح ..واقفين يازمن
فى وش الهوى والريح
مدابيح وبنصرخ
من عز الالم
ما حد سامعنا حد
فى الكون الفسيح
وان قولنا اة.مانسمع
غير تجريح
لا وقف جنبنا حد
وبنعد السنين عد
ناس كنا فاكرينهم
زى السيف الحد
طلع كلامهم كدب
مش صحيح
مجاريح
مجاريح
مجاريح.. والكل باعونا
وجم علينا وضيعونا
لا منهم ولا كفاية شرهم
ناس كنا فاكرينهم دهب
طلع معدنهم صفيح
مجاريح
مجاريح
مجاريح ..ولية الطمع فينا
اتسرق عمرنا
وعايزين تكملوا علينا
دة احنا
لا يوم فرحنا ولا غنينا
نفسنا فى كلمة حق
من راجل مليح
مجاريح
مجاريح
مجاريح ..رضينا با الهم
والهم مش راضى بينا
سامعين عارفين شايفين
كل حاجة
وغمينا عنينا
غدارين قدارين جزارين
وانا الطير الدبيح
مجاريح
مجاريح
مجاريح ..اللى فاكرينة موسى
طلع فرعون
كان الله فى العون
الصير طيب وكلة يهون
معقول فى بشر كدة
كل كلامهم قبيح
مجاريح
مجاريح
مجاريح ..سهارى
النوم من عيونا راح
حيارى
الهم من على قلوبنا
مش عايز ينزاح
ضحايا
لا لينا ذنب فى اللى جاى
ولا حتى فى اللى راح
دة احنا كنا ليهم
زى النجوم مصابيح
مجاريح
مجاريح
مجاريح ..والجرح نار
ودوقونا طعم المرار
وباعوا واشتروا فينا
وكان وردهم صبار
جيوبهم فاضية
لا شوفنا منهم يوم
فرح ولا تفاريح
مجاريح
مجاريح
مجاريح ..عزارى العقول كنا
بكارى القلوب كنا
غزارى الدموع بقينا
لا لينا ذنب
عايشين على جنب
وبا النار اتكوينا
دى شورة العوازل مرة
ما تسمع منهم
غير فحيح
مجاريح
مجاريح
مجاريح.. انا وقلبى
وانتم والايام علينا
لا شوفنا راحة فى قربكم
ولا يوم اتهنينا
حقى فين يازمن
من عمرى دفعت الثمن
دة احنا
لا بيعنا ولا اشترينا
واتارى دموعهم علينا
كانت دموع تماسيح
مجاريح
مجاريح
مجاريح ..ظلمونا واتظلمنا
واحنا عمرنا ماظلمنا
وتوهونا
فى نورنا وظلامنا
ياناس
الظلم ظلمات
كلام قالة
نبينا محمد..وموسى الكليم
وابن مريم
الطاهرة البتول
عيسى
بسوع المسيح
مجاريح
بقلمى
محمد يونس