عم خلف وسنينه السودا
بيجيب زاده بطفح الكوتة
والمخاليق يتبدل حالها
لكن هو ما يتبدلش
عمره ما فكر يوم فى القرش
والمخاليق تبني وبتعلي
إلاه هو .......زى ما هو
من يوم عينه ما جت ع الدنيا
لساه ساكن نفس الأوضة
عم خلف وسنينه السودا
عم خلف على باب الله
مش شحات ولا م الدراويش
ولا قهوجي عاش ع البقشيش
تظبط ساعتك خمسة الفجر
تلقاه نازل زى العادة
حاطط كل لوازمه ف كيس
عم خلف كمسري أتوبيس
عالم نازلة وعالم طالعة
والأتوبيس بقى زى الدار
أللي بيشتكي سوء السلعة
والأسعار اللي بقت نار
واللى يزعق للسواق
فاكر نفسه بيركب أوبر
ناس تانيين واقفين يتخانقوا
م اللي هيكسب ماتش السوبر
عم خلف عمال يتفرج
ع اللي بيشتم واللي يهرج
بس دماغه كانت مشغولة
بنته حنان نجحت والأولى
بنته حنان بكرة هتتخرج
خلص شغله أوام قام روح
شاف قدام البيت فيه دوشة
اللي بيحضن واللي يهني
واللي بيرقص واللي يغني
واللي بياخد وياه صورة
حتى الواد ابو شورت وكورة
ساب اللعب عشان يباركله
بنته خلاص صبحت دكتورة
بس برغم إنها دكتورة
لسة الدنيا ما وعيتهاش
إن نجاحها ماكنش بلاش
وإنها مهما تزيد أو تعلى
مش مفروض تصبح مغرورة
نسيت ناسها وصابها الكبر
نسيت إن الأوضة الشبر
كانت ليها الفضل عليها
وبرغم إن خلف غلبان
كان بيحوشها كتير من فمه
لجل يوفر حق الحبر
أخر مشهد بعد الفجر
كان بيبارك بنته حنان
وبيفتكروا حكاوي زمان
بس لمح فى عينيها لثانية
أنها كبرت قد الدنيا
وإنها خايفة صحابها تشوفها
وياه صدفة ف أى مكان
عم خلف كان رايح شغله
بدموعه المحبوسه ف عينه
والمشهد مليان بسنينه
كان بيكبر...كان بيعلم
بعد الصبر دا كله اتألم
بعد الويلة وبعد الفكر
30 سنة يصحى من الفجر
سمعته كانت زى الطبل
كان مربوط ف الساقية بحبل
واما وصل عند الأتوبيس
طلع السلم ومكملش
قلبه ضعيف قام مستحملش
راح واقع قام داسه الدوبل
كان مربوط ف الساقية بحبل
كان بيموت وقصاده حنان
بالمريلة أيام الروضة
عم خلف وسنينه السودا
.....A.....S.....
#ابن_الملاح