--- هم الولدين
**************** محمود عمار الزلباني
طب أعمل إيه ف الزمن
ومنه أروح على فين
عايشة بقلب المحن
وصبري بقى فدادين
وهم من غير تمن
ودموع على الخدين
نمت كتير في الطل
صايمة بقى لي سنين
شاربة مرار مع ذل
وتايهةمع التايهين
في دنيا خيرها قل
والباقي دمعة عين
نفسي في حبة ضل
تحميني من نارين
نار الفرقة عن ولدي
وخايفة نموت جعانين
عايشة ميتة ف بلدي
وهمي لقمة الولدين
دول إتيتموا بدري
غلابة وكمان مساكين
ع اللقمة أنا بأجري
وأيام نبات بكيين
شيلاهم على صدري
والشكوة بس لمين
نتمني شربة مي
متعكرة بالطين
عيشة ماليها زي
وبهية تنادي ياسين
ماتوا الولاد يا خي
كفنهم دموع العين
في الدنيا بقيت وحدي
ولا عارفة أروح على فين
ومين يمسح دموع خدي
ويعطف على المساكين
بيقولو ا ليا عيد
ولا شقتوه بقى لي سنين
الهم ليه مواعيد
والفرح أجيبه منين
غير الوحدة والتسهيد
كل الأمل في الله
هو الأمان ومعين
حنانك يارب ألقاه
يمسح دموع العين
وكل إللي فات ننساه
أمين يارب أمين
------------------- محمود عمار الزلباني