لماذا يستخف الشباب بكلمة الموت وكأنها أصبحت موضة الكل بيجري وراها وبيقلدها !
يمكن فاكرين انهم كدا الناس هتعرفهم ويبقوا حديث الساعة خدو بالكم من كلمة ( الساعة ) كويس .
لانهم بالفعل هيكونوا حديث ساعة واحده!
او يوم او بالكتير أسبوع.
وبعد كدا كل واحد هيكمل حياته عادي ما فيش شيء هيقف علشان هو مات !
ولا حد هيموت وراه حتي لو كان أحب شخص لقلبه
والعاقل هيقول عليه خسر الدنيا والآخرة
وهيحاول يصحح من نفسه علشان يعيش الحياة اللي ربنا وهبها له.
لو بعد ساعة واحده خرجت من قبرك ورجعت بيتك ما فيش حد هيرحب بك حتي لو أمك !
الكل هيخاف منك وهيقول عليك شبح!
ليه عاوزين تكونوا أشباح؟
يا ترى الشباب اللي بتكتب كل شويه عن الموت وتغير صور البروفايل بصور كئيبة
فكروا في الناس اللي بتحبهم وازاى الحاجات دي بتوجعهم
حتي لو مش حاسين ان حد بيحبكم او بيهتم بكم
فكرتم في أمهاتكم وازاي كلمة موت الابن او البنت
بتقلع قلبها من صدرها
اتمني من جميع اولادنا انهم يعرفوا ان كل ام واب ما فيش شيء في الدنيا بيسعدهم غير سعادتكم.
يمكن بنتنفس ألم وبنعيش أصعب ظروف.
وساعات بنبات ببطون خاويه .
لكن كل ام واب مجرد ما بيشوفوا اولادهم قدام عيونهم كل أحمالهم بتنتهي وكأنها ماكانت !
مش هقولكم ان ماعندكمش مشاكل والدنيا وردي!
لان فعلا ظروفكم صعبة
اللي حابب كليه معينه وواضع عليها جميع احلامه والتنسيق خذله !
واللي اتخرج وحقق حلمه في التعليم وقاعد علي القهوة او شغال شغلانه مش اللي هي علشان يقدر يساير الحياة !
واللي مطحون مع أهله بس علشان يوفر اللقمه!
واللي عاوز يجوز والماده مش متوفره !
في النهاية الجميع عنده بيت بيأويه
فبلاش تتكلموا عن الموت لأنه جاي جاي ما فيش مفر منه !
إتكلموا عن احلامكم حتى لو شايفين انها مستحيل تتحقق.
اتكلموا عن المستقبل حتي لو عن قناعة شايفين ان المستقبل عتمة.
إضحكوا مع صحابكم كتير وكل واحد يعيش سنه
بلاش تستعجلوا الايام ربنا كبير.
لو كل شخص ضاقت به الدنيا فكر في الموت
كان زمان عدد القبور أكتر من عدد البيوت
اين كانت ظروفكم
بلاش تنسى وحشة القبر وضيقه
بلاش تنسى ضلمته ووحدته
بلاش تنسى صوت خطاوي أحب الناس لك وهو بيبعد عن قبرك وبيسيبك لواحدك
بلاش تنسى قلب امك او اختك او ابوك او حبيبتك او زوجتك او صديقك اللي بإديك طلعت الفرحه منه وزرعة مكانه الحزن والألم
الحياة حلوه بكل متاعبها وصعابها والخنقه اللي فيها
الحياة حلوه بوجود ناس أكيد بيحبونا حتي لو فرد واحد
الحياة حلوه بكم اولادنا وبناتنا فبلاش تسلبوا حياتنا بتبديد حياتكم
#سناءأبوطبل