داين / تُدان
الدنيا دي مالهاش آمان
يوم ترفعك رأيه ف علم
يوم ترزعك 2000 قلم
ويوم يفوت مليان سكوت
ونلقى إحساسنا انعدم
فاوعى الألم يكبر ويصبح ميدان
داين / تُدان
في المبتدا كنت المنعم في السما
كنت الملاك
وحوا من ضلعك / سكنك وضلك /
حضنك دفاك
وروحت للشيئ الوحيد / اللي اتمنع عنك
/ طمعك ملاك
فتحت ودنك للشيطان / فرماك مهان
داين / تُدان
ونزلت للأرض الخراب / عشان تزاول مهنتك
علمك حتة غراب / إزاي تداري سوءتك
جهلك عماك / مانسيتش أبدا زلتك
هياها نفس الزله / وز الشيطان
فقتلت اخوك بإيدين جبان
داين / تُدان
البير لساه هناك / شاهد على غلك ياغادر
نفس الحكايه فلاش باك / وكأنه بث مباشر
مد السلف للخلف والعرق دساس ونافر
لا خدت من زمنك عظه / ولاسيبت حتى الموعظه تدق البيبان
داين / تُدان
كل الحروب ع الارض / كات فكره بنت حرام
وانت اللي بعت الفرض / بالنهب والإجرام
لاخوفت غضب الله / ولاقلت مره حرام
شربت دم أخوك / واكلت من لحمه
لساك على عهدك مالكش أمان
داين / تُدان
رب العباد كرمك / بالعقل تجمع في الأحبه
وتكون دوا / تداوي كل اللي انجرح
/ زي الأطبا
وتسيب سلام الله / ع الأرض يطرح محبه
بالحب تخضر السنابل في الغيطان
داين / تُدان
داين / تُدان
.................................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية