لا تقطفي. .بقلم الشاعر. .صبحي ياسين

«ذكريات» بقلم الشاعره 🌺عبير محمد علي 🌺

❤️صباح الخير يا بهية❤️

عقلي فيكي احتـــــــــار
وف جمالك يابهية ميــن
جوة قلبـــــــــــك ليا دار
وانتي دارك جوة عيــــن
حبك لقلبي عمـــــــــــار
نور ينور ع الجبيـــــــــن
ليا جـواكي اســـــــــــرار
انهــاردة ومن سنيـــــــن
اسرح ف عــز النهـــــــار
لو زاد عليــا الحنيـــــــن
لذكريــات قلب الصغـــار

لشجرة بقت طارحـــــــة
زرعناها جـــوة طيـــــــن
ولبس العيــد وفرحــــــة
لمة إخوة بنات وبنيــــــن
اب وام وقلوبهم البِرحــة
وفرْحِنا نقسّمه نصيـــــن
حصان وعروسة بالطرحة
لعب عيال حريفة ملاعين
لشوارع ضحكتها صابحـة
والأمان ع الجانبيــــــــــن
لناس ف البحر سارحـــــة
من الفجريــة صاحيــــــن
وشباكهم بالخير وطارحة
وبرزقهم شاكرين راضيـن
لناس بوشوش مسامحــة
وقلـوبهم عمــرانة ديـــــن
وشيخ براديو يقرا فاتحـة
يدعي والكل يقول آميــن
واللي يشكي يوم بكُحـــة
الوجع من غير انيـــــــــن
الحمد والتسبيـح بسِبْحَـة
والرضا بنعم رب العالميـن

عيوني ف سماكي سابحة
وف جمالك يا بهية ميـــن
ده فجمالك يا بهية فرحـة
تخلي الصباح صباحيــــن
بقلمي:
🌺عبير محمد علي 🌺