من جنابي ها طق
ف اخلاقنا توتو دا بلوه
وعب رحيم علي حق
........................
.........
شخبط علي ألإسم القديم
وهات لي إسم وصَلَحُه
ف الأصل إسمي عب رحيم
جابوا له توتو يمسحه
......
فيه ناس كتيرمبيختشوش
قلوب ذئاب مبيرحموش
لبسوا القناع فوق الوشوش
وهات ياحُب ومَحْلَسَه
.....
بحب ياكل حقنا
وبحب يبقي مننا
وبحب برضوا يخُمِنا
في الخم أسس مدرسه
....
وِقِف وقال حَيٌ مَلِكْ
درويش وماشي بزمبلِك
إتنين شحوطه بيَمتلِك
واقفين لزوم الهندسه
......
وقال كمان بوقين عَجَبْ
صيمنا من أوِل رَجَبْ
وقال كلامه واحْتَجَبْ
شهيصنا آخر شهيصه
......
وشه الشرس وشه الحقود
وشه النواعم ع الخدود
وكمان بيخلف ف الوعود
يكنس كلامه بمكنسه
.....
ولوقال شمال إحدِف يَمِين
كلامه دايما بِ اليَمِين
ياكوف وعِزرا وبنيامِين
دجال وماشي بمَسبَحَه
......
ياناس قرفنا مِن دِي ناس
رقبه وفيها ألف راس
إن كان ببلطه أوبِ فاس
نمسح دماغه بممسحه
.......
تغُور دي العيشه معاه
مليون ألم وب ألف آه
ناطط وفاطط ..مين وراه
تِطرَح في عيشته بمَطرَحَه
....
طاب فين زمانك ..عب رحيم
إبن البلد ..أكرم كريم
وطول حياتك مُستقيم
عيشتك دي عيشة بَحبَحه
......
إبعد يا توتو عننا
يا عب رحيم.. قوم ضُمِنا
وتحت سَقفك لِمنا
يا توتو ...شوف لك مَصلَحَه
....
سيف عثمان