في عيد العلم يا سمرا
يا بنت النيل يا مصريه
نجومك من السما طله
وعلمك ارض مرويه
اروح الغرب يشهدلك
وانا من نفسي اشهدلك
د عقلك يوزن الملايين
وعلمك شمسه من فجرك
كيانك كله حنيه
يا بنت النيل يا مصريه
واهل الشرق يدعولك
دوام الصحه والعافيه
يكون تغريد بلابيلك
دروس العلم في الصفحه
وشاره في طرف منديلك
تقول للكل بالفرحه
ابويا قال لي اهتمي
وكان العلم د همي
اقوم بالهمه واتعلم
وتكمل دعوتك امي
اكون الاولي والالفى
واكون في الزهر جوريه
يا بنت النيل يا مصريه
ويوم تتويجي يندهلي
حبيب القلب من اهلي
بروحه الحلوه تضحك لي
فاكون عزه وفخار بيها
وفوق الراس يطبطب لي
شفايفه تقول معانيها
يا شيله اسمي اسم الله
يصونك ربي ان شاء الله
وسيرتي من الجنان هله
اقول البنت دي بنتي
وامي تجبلي عسليه
يا بنت النيل يا مصريه
ولما القاعه تتزلزل
نشييد بلدي اذان جلجل
ونبضي كمان كده يهلل
يقول محلاك يا نيل اسمر
بتجري في قلبي تتمخطر
وزرعك طرحه دوم اخضر
وانا من طرح عيدانك
وحضني هو اوطانك
وضحكي لون في الوانك
في موجك وحدي حوريه
يا بنت النيل يا مصريه
وكان نفسي تكون جنبي
بتسند دمعه في قلبي
لحضنك اجري واتخبي
والملم فرحتي وحبي
وتطبع علي الجبين بوسه
تكون في الغربه محسوسه
وكل الناس تشوف ايدك
بتاخد ايدي بوريدك
ونطلع للمنصه لفوق
ونتكرم سوي بالشوق
فاكون منك كيان مشقوق
تكملني واكون دينك
ونخرج وسط تصقيفهم
ونبعد حبه عن طيفهم
فيجمعنا كلام عشاق
وحضنك ليا والاشواق
ونام واصحي انا وانت
ونبقي قصه مرويه
د مصري وعشقه مصريه
