عتريس
والنبي ياخوانا أنا واد عتريس
أنا عتريس والنبي ياولاد
إيه يعني دا مبدأ ماشي عليه
هيصوا زيطوا ياخوان قولوا هيه
إيه يعني أوزع من أراضينا
إن كان فى حلايب ولا فى سينا
إيه يعني أستقوى باخويا هنية
ولا أوباما ولا علية
إيه يعني عفيت عن مية إرهابي
إيه يعني حويت تعابين فى جرابي
أنا شربة زيت ولازم تشربها
يا شعب يا طيب خد جربها
و رد عليا بسرعه يا شعب
وإلا راح أملا قلوبكم رعب
ياتقيل الدم أسكت وإتلم
وإسمع مني كلامي ياعم
ياشربة زيت محناش شاربينك
كلمة هقولها أنا بيني وبينك
لاحنا لوكاندة فى كلوت بيه
ولاانت نزيل ومعاك أبونيه
ولاحنا أحباب فى درب طياب
ولا لحمنا عرضة لأي كلاب
إن كان حلم أهو حلم وفات
محناش حريمات مفيناش فتكات
حتى الستات لابسين شنبات
وسنان مسنونة للديب لو فات
عدي ومر فى خيبتك جر
عضمنا ناشف لحمنا مر
لاإنت فى يوم تنفع عتريسنا
ولاحنا فى يوم راح نبقى دهاشنة
بقلم طارق السيد
