لا تقطفي. .بقلم الشاعر. .صبحي ياسين

شعر مات
..............
ماشية القصيدة ع الصراط
مرّه تقع على وشها مرّه تمد الحرف
تتشعبط ف باط
كلمة قالتها ف وقتها
مرّه تشوف لمحة أمل.... ريحة جمل
نزلت دموعها غسلتها بالعياط
مرّة تهب النار فاتلفح وجهها
وتشدها بعض المعانى
كات قالتها بانبساط
ماشية القصيدة ع الصراط
مرات كتير تشعر بنار
وساعات قليلة تحس إن الفرح آت
بين ذنبها وحسناتها شاعر
مات قتيل..مات عليل...مات بكلمة غدر كسرت وزنها
أو من المعنى اللى عبّر عن حقيقة حزنها
مات غصب عنها ..بإذنها
لكنه مات
ماشية القصيدة ع الصراط
فاضل على الآخرة زمن
الكلمة فيه قنطار شجن
الشعر طالع من سكات
الشمس غابت والقمر
المستخبى منهمر
الليل معبى مفاجآت
عنوانها مش من جنسها....متمردة
معناها يمشى كده وكده مترددة
بايتة فى حضن الفكرة
فى كل اللغات
ماشية القصيدة ع الصراط
كل الكبائر ف القصيدة واللمم
كل الضمائر للغياب
ولا حرف جر الا انسحل
ولا فعل أمر الا اما شاب
إسم الإشارة كان هو
الكذب فى أعلى الهمم
الغش فى كل الصفات
ماشية القصيدة ع الصراط
كتب القلم من كل حرف
ظرف الزمان اللى انحبس
واقف على آخر نفس
مش لاقى صرف
كل القصيدة من تقاليد الألم
من كل عرف
مين اللى أفتى للقصيدة بالهوى
خلاها باتت خارج ألأبيات
ماشية القصيدة ع الصراط
مين اللى علمها الأمل
مين اللى وراها السهر
مين اللى خلاها بحالات
مجنونة كامله بعقلها
شاعر غبى علشان يسيبها لوحدها
ويروح قصيدة تانية
ينوى الشعر ينوى الحب
يقرا الفاااااتحة على شعر مات
ماشية القصيدة ع الصراط