أرواح تموت م الخضة
وعيال تموت م الجور
إركبها صايم واتوضى
ديما الموت ف الفوضى
مركب
بحرها مسعور
ع الشط الجوع مستني
وحزام البطن إتشد
دعواتك ليه يا أمى
طبطبى على كتفي وضمى
لميت الهم في كمى
وعملت حساب الغد
أول ما أوصل هبعتلك
مكاتيب وصور واحكيلك
معقوله أسافر يعني
ودموع الخوف دي في عينك
خلي الضحكة تودعني
على حزنك أنا ماقدرش
عارفه انا ايه يرجعنى
لو اموت غرقان ماوصلش
والموج ده يخدني في طيه
أنا هرجع ليه ولمين
الموت ده ماشوفتش زيه
ولا عيش مكسور وحزين
#عادل_عوف
