لا تقطفي. .بقلم الشاعر. .صبحي ياسين

( ليل الشتا طوييييييييييل ))

ليلا قرأت كتاب
في ليله ما جالي منام
في صفحه قرات كلام
عن الشتا وطول ليلاه
افتكرت زمان
وحكاوي امي والجيران
ابوسيد وحرمه
وعتريس دا كلبه وعياله كمان
عواف عليكم جيران الهنا
ماقعدناش بقلنا زمان
اتفضل يابوسيد دا بيتك اهلا وسهلا
زرنا النبي وفين باقي العيال
والله الشتا بيحب الونس
وراكيه النار ولمه الجيران
فين ياولاد الشاي
الله : بالعجل يالا اوام
اهلا وسهلا نورتوا المكان
دور ياسيد الراديوا عالبرنامج العام
دي سومه حتغني هذه ليلتي
وعايزنا نرجع زي زمان
كلام وحديت وذكريات
ضحك من القلب ونقول كمان
دي البت زكيه جالها خطاب
كده كده واقفين علي البيبان
بس النصيب غلاب
خدها بن منصور العلاف وطلع غلبان
والواد سلامه راح الجهديه
وعيطنا وراه وسابلنا العيال
معلش ياختي ربك موجود
وربنا يخللكوا ابو العيال
وحياتك انت تعبان راح للحكيم
قاله المراره والقلب بعافيه كمان
الف سلامه انشاله العدو
واللي يكرهوا كمان
تسلمي يا زكيه يا اصيله
يابنت الناس الحسان
ياله ياولاد الساعه بقت كام
الله : دا لسه بدري وقلنا وعدنا الكلام
ماهو ليل الشتا طويل
زي سواد دي الايام
تتمسوا بالخير والسهره عندنا بكره
ان شاء الله وحنعيد نفس الكلام
مع السلامه يابو سيد
وخلوا بالكوا من العيال
قفلت الكتاب وقلت انام
وتمنيت يرجع زمان وناس زمان

بقلمي
تحياتي