الأمل ويا العمل
الحياة من غير أمل تسوى إيه
والأمل من غير عمل يفيد بإيه
تحلى الحياة بالعمل لو إكتمل
نقع نقوم نقع من تاني دا محتمل
لكن المهم نقوم ونصلب العيدان
نبقى الجنود زي الأسود جوة الميدان
حاميين بلدنا من التعالب والديابة
والزغابة ودود الأرض والغيلان
أصل الأمل هو السلاح وبالكفاح
وبالعزيمة المستحيل يصبح متاح
يلا بينا بالإرادة والأمل
يتمخض الليل بالعمل يولد صباح
قوم يامصري بكل ذمة وكل همة على الفلاح
مش هتفيدك الدموع أو النحيب أو النواح
قوم يامصري مصر أمك مشتاقالك
قوم ماعاد إلا الميعاد والميعاد فجر الصباح
وإن يجيلك مهما جالك
إوعى يوم تشغل في بالك
غير بس إن مصر أمك
في وقت شدة ومحتاجالك
بقلم طارق السيد
