أم الشهيد
فضلت تدور
وكمان تهاتي
تعالى جنبى
يا ابن عمري
مش سامعة رد!!!!!
شمت هدومه
لقت ريحتها
مرشوشة ورد
راحت فى نومة
شافت ضناها
بيقول يا أمي
لو حد جَالك
يا غالية يا مةْ
وقال ده مات
قولي مَمَتْشْ.
لو جابوا صورتى
لحد عندك
شوفتيني فيها
حقيقى مَيِتْ
قولي مَمَتْش.
حتى إن جابولك
شنطة هِدومي
فيها لوازمي
مليانةْ دم
قولي مَمَتْشْ.
أمانة يا مة
كل جيوبى تفتشيها
هتلاقى ورقة كتبت فيها
لسه يدوب
والشمس رايحة
ناوية الغروب.
إقرى جوابي
وافهمي
كل اللي كتبه
بين السطورْ
أمانة يا مة ما تصرخي
ولا تبكي أبدا
رشرشي فوقي العطور
افرحي يا مة وزغردي
إبنك مَمَتْشْ
إبنك مكانه فى السما
مش في القبورْ
فاكرة زمان
لما حكيتي
عن العبور
لما جنودنا عبروا القنال
وكل واحد رسم تاريخ
عمره ممكن يتنسي
طول العصور
و قلتي لية انك ساعتها كنتِ حاسة
بروح ولادنا فوق أرض
سينا كانت ترفرف
زى النسور
أنا ممتش أنا لسه حى
حتى تعالى واحضنينى
وبكف ايدك متلمسيني
صدقتي يامة
شفتي الحقيقة
وعرفتي إني
لسه ممتش انا لسه حى
وحتى بصى حواليكي تانى
هتلاقى
هالة وشعاع وضى
منا لسة حى
بقلمي
سلوى علي محمد