لا تقطفي. .بقلم الشاعر. .صبحي ياسين

#وحدي
ماشي بنوري ف عتمة ليل
العمر بيسرق مني خطاوي
عقلي صغير ان الآوان
يكون كما حمال العرش ف السما السابعه
لفظ الجلاله منقوش على صدرهم
كتاب الله نور دربهم
سطر كتابك من جديد
فوق منبر الأوجاع
اخطب ف كل افراحك
ممنوع النبش ف ذكرياتي
وانا كف ايدي اتقطع
من كتر رمي اللوم عليه
والعضم نبت من جديد
والجسم بور
ويطل القمر من اخر سرداب ف الليل
فيستقوى عليك
ينور الكون ويضلم طريقك
يجي الصبح يرقص
على نغمةالعصفور
تبكي ف نص الطريق
فتعري فيك الشمس
وينهش ف لحمك الطير
قعد وجمع بواقي اليأس والإحباط
دوبهم ف كاس
صعدت للسما سحاب
فدمعت فوق راسه احلامه
قام اتمرد عل الكون
فطروده براه
وبعد المجره ظهر
رسام وناي وفرشه وكمان
صوت الكمان بيعلى والأبالسه بتعزف ناي
تتنصب اللوحه
الملايكه بتراقب من بعيد
صوت ادان الجنه مكتوم
و النار بترقص ع الالحان
ع الجدار الخلفي للكون
الجن يقرا تعويذه
فينخر السوس ويولع ف الكتاب
يترج المسرح
فتوه الملايكه وسط الشياطين
يطرطش الحبر فتتشوه اللوحه
والنهار جوه سجن الليل
متكسح من التعذيب
والشمس مطفيه ورا القضبان
والقمر خجلان يطل
فتثور الجنه وتقتل الرسام
وتكمل فرشته بدمه الكلام
مالكش في هذا المكان
#فايز_المعداوي