الناس مشغوله بحالها
وماحدش بيسأل مالك
الأم يا دوب لعيالها
وأبوك بيطنش خالك
والأخ بينكر أخوه
ويقول الدنيا مشاغل
والود خلاص غلوووه
زرعين الوقت مشاكل
والجار مش عارف جاره
والكل غريب قلقان
واخد من بدرى قراره
يتحاوط بالجدران
عايشين في جزر معزوله
ولا وصل بعين ووصال
قال يعني الناس مشغوله
من أب لعم لخال
وإن مرة إشتقت لعيلتك
تستنى مناسبه تشوفهم
والغالب هي دى حيلتك
علشان تقدر تعرفهم
ف تلاقى عيون بقول لك
بسلامتك تطلع مين
غير ناس هتخش في حضنك
يقولولك والله سنين
وعتاب من ماركة فينك
طب ليه بطلت تزورنا
ويارت لو نبقي نشوفك
دا وجودك هينورنا
تخلص علي كده وخلاص
وتروح لليالي بعيدة
وعلشان الناس للناس
نستني مناسبه جديده
.
#عادل_عوف