قسم الزواج
********
هو :
ياعم يا مأذون
ويشهد عليا الناس
حبيتها أنا بجنون
ووقعت فيها خلاص
هى :
فيه بعد قوله دا قول ؟
دا جِميل تشيله الراس
ها أفضل معاه على طول
وها أعلمه الإخلاص
هو :
ها أشيلها جوه العين
وأحميها برموشى
وعشان راحتها ياناس
النوم ما أشوفهوشى
هى :
وأنا كل ليله أرقيه
وبين ضلوعى أداريه
وإن قال جعان أطبخ له
فته و لحمة راس
هو :
لأ نفسى ف القلقاس
والعدس أبو شعريه
معاه عصير أناناس
هى :
تأمر ياسيد الناس
كلى نشاط وحماس
بس إنت هات وياك
اللحمه بالأكياس
هو :
لييييييييييه ؟
هو إنتى معرفتيش ؟
والنعمه ماعرفتيش ؟
إن الجهاز خلانى
م الماده جيبى مافيش
هى :
تبقى ياروح الروح
على بيت أبوك هاتروح
وإن زدت ها أتهور
ويا حبى ما تلومنيش
هو :
أه يا زمــان العبر
سوق الحلاوة جبر
مش كنا متعاهدين
نبقى جسد بروحين
هى :
غـيرك كــتير قالــوا
ع الحـــلوة والمــــرة
وأما الفـــــرج جالوا
رجـــع معاه ضـــرة
هو :
ليه الظن بيا يسوء
دا الدنيا زى الســـوق
فيها لمـــــون حامض
وبرضه فيه برقــــوق
هى :
عاهدنى ع الإخــلاص
تلقانــــى حضـن وبيت
من بين الوف الناس
إخترت أنا وحبيت
هو :
وأنا ع الكلام دا بَصمت
وبكــــل حــب مضــيت
تبقى إنتى نصى الحلــو
ياما ف صلاتى دعيت
محمد عبد المنصف
