يانبع حنان
------------
يانبع حنان بيتجدد مع الأيام
يانسمة حب تتودد بأحلي كلام
وبلسم ياما بيداوي جراح وآلام
ونور بشعاعه بيبدد لأي ضلام
وقلب يضم ويطبطب علي الأيتام
وراح مشتاق وبيلبي ندا العلام
ونام القلب واطّمن ف أحلي مقام
وصلي عليه ألوف شايلة لوا الإسلام
ف بيت الله ، وبيرفرف ف بيته حمام
دا إسمك غالي ف قلوبنا .. وأغلي وسام
يا أم الكل يا طِيبة ومالها حدود
يا أم الخير يامضيافة يا أم الجود
بتدِّي من حنان قلبك أمان وورود
وعلمتينا نتصدق من الموجود
وبابك للضيوف عمره ماكان مسدود
لغيرك .. كل ماتملك إديكي تجود
ودمعك ع المريض سايل بيروي خدود
ومهما غيبتي يا طاهرة دا ليكي وجود
مقامك والله دا غالي لدي المعبود
ويابخته اللي كان زيِّك كده موعود
ياشايلة همنا كله ولا همك يشيله حد
يادافعة عزمنا بهمة ونفسك نوصلوا للمجد
يارافعة إسمنا عالي وعزمك كل يوم يشتد
وبنقصَّر تودينا تضمينا بكل الود
ولا تشيلي زعل منا ولا مرة تخاصمي بجد
ويوم رحتي وفوتِّينا ماكان منا في يوم اللحد
ولا واحد يواسيكي ولا واحد هداكي ورد
أبوس إيدك تسامحينا ديوننا ليكي مالها عد
ورب العزة ياغالية مكانك عمره ما ملاه حد
ح اعيش طول عمري أتمني
نكون صحبة ف يوم الوعد
أم الشعراء
سامية سليمان
