غربة
-----
وآه .. وآهين وآه يامَّه .. بقيت تايه ف دي اللمة
تعالي أترمي ف حضنك .. دا قلبي مشتهي ضمَّة
خديني يا أمي علي صدرك.. أزيح الهم والغُمَّة
وخليني أبوس كتفك .. وابوس راسك وابوس ضيِّك
تعبت كتير أنا ف بعدك .. ومش لاقي أنا زيك
يا أمي ليكي قلب كبير .. بيروي الدنيا من ريِّك
ورحتي فين ؟ وسبتيني .. لشوقي وقسوة الحرمان
حنيني كل يوم بيزيد .. ولا الفيضان ولا الطوفان
وفين ألقالي أرض أمان ؟ .. كانت وياكي يامّه زمان
وحشتيني يانبع الخير .. تعالي وهاتي حضن كبير
وحشتيني ورحتي لفين ؟.. وسبتيني لوحدي أسير
وحشتيني يا نني العين .. مليش غير ربي بس مجير
وآه .. وآهين وآه يامَّه .. ف بعدك تهت انا توهان
وكان قلبك وكات عينك .. ملاذي همُّه والأوطان
ودنيانا بقي الإنسان .. يادوب عايش مع الأحزان
خديني يا أمي علي صدرك .. ف حضن كبير يدفيني
ينسيني ألم بُعدك .. ومن أوجاعي يشفيني
وليه رحتي وسبتيني ؟ .. تعالي يا أمي ضميني
يا أمي إرجعي ليَّه .. ياتاخديني معاكي هناك
لعالم كله حنيَّة .. هنا أوهام هنا أشواك
هنا القسوة خدت مني .. أمانيَّة ف أقوي شباك
خدت ضحكي .. خدت عمري .. واديكي عارفة من صغري
ماليش غير قلبك الدافي .. يشيل عني جميع أمري
وأشرب نبعك الصافي .. ويشرح لي أنا صدري
حنان ودعاء يدوِّبني .. وأسمعلك واقول يارب
بحلو دعاها توعدني .. وتغفر لينا أيها ذنب
ومهما غبتي يا أمي .. راح ابقي ع العهود والحب
يكلم قلبي انا قلبك .. بدقاته .. بأناته
يناديلك ويحكيلك .. بمُرُّه .. ويا آهاته
بدون يا أمي ما اتكلم .. ح يسمع نبضه وسكاته
سامية سليمان
أم الشعراء