شعر غنائي
مصعبش عليا
-------------
مصعبش عليا حالك
رغم الوجع اللي فيك
حالي مش زي حالك
روح ربنا يشفيك
***
يشفيك من حب كان
قديم سبب الوجع
مر عليه الزمان
معرفش انك جدع
***
غير طبعك وبدل
بص لنفسك وعيش
مسيرها يوم تتعدل
والفرح ماينتهيش
***
علشان تلاقي روحك
مع قلب يكون حنين
غير صمتك ببوحك
واظهر حبك وبين
***
خليك زي الملايكه
بروح حلوه وخفيفه
متكونش حبال وشايكه
لنفوس خايفه وضعيفه
***
دعيت من قلبي ليك
تكون صاحب شعور
واسيب قلبي ف ايديك
يغرق ف حنان بحور
---------
بقلمي
احمد عبدالله الاسيوطي
