لا تقطفي. .بقلم الشاعر. .صبحي ياسين

السلام عليكم ورحمه الله وبركاته أهل همس مصر الكرام
معكم المسحراتى .....
يقدمه لكم اليوم / إبراهيم معوض
ـــــــــــــــــــــــــــــــــــــ
مسحراتى منوفى
ــــــــــــــــــــــــــــــــــــــــــ
مسحراتى وداير
ف وسط البيوت
بصحى اللي حاير
قدامه أفوت
على رزقي ساير
دي ميه وقوت
من قلب (الشهدا )
بنادى وثاير
(شبل الأسود)
يصحى الصايم
اصحى يا نايم
أوعى مزاجك يتعكر
اصحى يا سكر
ف (كفر عسكر )
داير أسحر
دي بلد الحبايب
اصحى يا غايب
(وعم أحمد )
و(المدندش )
جاي ينتش
حكاوى من فنها
وع الطبلة تكه
افتح لها سكه
(طوخ دلكه)
أصل الشهامة
ليا فيها أهل ياما
و(سيدى خالد )
يحرس يساند
كنيسه وجامع
اصحى يا سامع
وسحور المودة
عندي النها رده
وف (ميت أبو الكوم )
صحى النوم
عنوان النضال
زعيم النصر
سيد الرجال
صنع م الحرب سلام
راجل تمام بعزم همام
أصحى يا كسلان
داخل على (زرقان )
فوق م التوهان
ف (سيدى نصير )
هيترفع الآدان
ونرجع نلف
قبل الريق ما يجف
على (دنشواى)
رمز الكفاح
يشتد عودي
أنا الفلاح
(زهران)  وجاي ع الطريق
يطفى غلاله صابها الحريق
يقف بطوله قدام السلاح
أصحى يا نايم
وحد الفتاح
دا طريق طويل ملفوف
يلا على (منوف )
ناس عتره تحب الضيوف
انزل وشوف
والرجل تدب
مكان ما تحب
من غير عنوان
دي تبقى (شنوان )
زرع المحبة
والقلب هايم
خضره وميه
اصحى يا صايم
قلوب بهيه
بأيدين عفيه
والجلابية تلقاها متشمرة
يلا أوام نور م الأمل مبخره
أقدام وجايه ع الطريق متبعتره
أصحى يا نايم
وصلى على نبينا الزين
وادخل معايا جوا (شبين )
عنوان المحافظة ورمزها
فيها مصالحها
ورئاسة حيها
و (سيدى خميس)
منور ف وسطها
وكل خسيس
مطرود من ضلها
معهد الكبد
مستشفى الهلال
تعالج الكبار
وتداوى الأطفال
وعم دسوقي البقال
اصحى اسعى
والرزق حلال
وقصر الثقافة
ومسرحيه
ف مسابقه تكسب
ع الجمهورية
وعم يوسف فنان جميل
لأن فنه بيعالج قضية
ونادى الأدب أفضل دليل
وكل الكتب جوا قلوبهم
قبل الرفوف
تكون معاهم تبقى حبيبهم
اهو عدى شوف
قلوبهم وصافيه
بحس شاعر
فيها المشاعر
بتملا الجوف
اصحى يا نايم
أمان هنا بلا خوف
أهلي تملى في كل الظروف
فلاح مثقف بياع ساعاتي
وعم مجدى يصحى يوماتى
ينضف شوارعك
ويطهر رصيفك
بقايا ضعفك
بقايا زيفك
يطهر ينضف
وكأنك عروسه
يزفك لضيفك
ونادى التجارة
وفرع النيل
شايل بشاره
أمل ودليل
أصحى يا صايم
أوعى تنام
سحورك عندى
تمام التمام
أصحى يا صايم
وأفتح عينيك
حس بكل المحرومين
صلى وزكى ياما عليك
تكون دوا للمجروحين
صلح مكانك
ابنى عشانى
ابنى عشانك
اجعل صيامك
بؤره أمل للمقهورين
صيامى أصله دنيا ودين
أصحى يا صايم فتح عيون
منديل زكاتك يسدد ديون
يمسح دموع المحتاجين
أوعى تسيب في يوم صلاتك
تعيش جوا نفسك كأنك سجين
إبرهيم معوض

===============
الحلقه بالصوت على هذا الرابط
https://www.youtube.com/watch?v=7cO50Bbco84&feature=youtu.be