لا تقطفي. .بقلم الشاعر. .صبحي ياسين

ليه بتضحك عينيكي
----------------

بقلمي / عادل عبد الرازق

----------------------

مش باودّع

كل أحلامي في عينيكي

مش بارجّع

كل أيامي في ماضيكي

لكني باندم عاللي راح
 
شايلة ضلوعي جراح

بابكي وعينيكي بتضحك

طب ليه بتضحك عينيكي

شبّاكك بعيد

وناصية الشارع ضلام

طارت عصفورة من صدرك

والشال على كتفك ما نام

عصفور بين ضفايرك محبوس

بيصرخ وينادي عليكي

وبتضحك عينيكي
 
طب ليه بتضحك عينيكي

في مفارق الريح انهزم الفارس

وحصاني جريح نايم في الدموع

أنا اللي طول عمري لهواكي حارس

وفي هواكي عايش موجوع

أنا عارف ان عينيكي عارفاني

لكن طريقنا حيطان وسدود

كل ما امشي طريقك واوصللّك

ألاقيني لنفس مكاني باعود

بيدوّر حلقي على صوتي

بينادي كلامي على سكوتي

ولا قادر أوصللّك

ولا حتى أقرّب إليكي

وبتضحك عينيكي

طب ليه بتضحك عينيكي

يا حبيبتي اللي راح راح

إن كان غنا ولاّ جراح

خلّينا عايشين زمانّا

الليل ليل والصباح صباح

أنا اللي محيّرني فيكي

إن قلبك بلا مفتاح

باترجّاكي وعيوني بتبكي

أدخل طريقي إليكي

ألقى عينيكي بتضحك

طب ليه بتضحك عينيكي
—