لا تقطفي. .بقلم الشاعر. .صبحي ياسين

***الشعر***
للشاعر/صابر الشناوى
الشعر مش بالكم
ولا بكتر حروف
الشعر دا إحساس 
ممكن يموت م الخوف
وممكن يكون عايش
جوانا لكن مكسوف
يتحس فى لحظه
وليها يكون ملهوف
ويحلم بشوق بكره
وهو وسط ألوف
وانا شعرى جوايا
قلم ومش مقصوف
* * *
نزلت بحر الشعر
أجر حروفه بالعافية
أضم فى المكسور
ووزنها بالقافيه
الشعر لحظه عشق
صادقه تكون كافيه
مش دمعه تملى بحور
باردة ومش دافيه
والكل عايش ف الدور
بقلوب مش صافيه
قالو شاعر مغرور
لأنه بلا قافية
* * *
الشعر يبقى جميل
لما يكون م القلب
يبدد ظلام اليل
ويفتح بيبان الحب
ويشفى قلب عليل
احتار فيه الطب
الشعر أصله دليل
بيوصل حبال الود
ويمشي غنى ومواويل
ويسمح دموع الخد
* * *
الشعر جوايا
كلام يكون مضمون
لأن اللى بيستمع عاقل
دايما وانا المجنون
اوصله بكلامى اننى عاقل
وبقول كلام موزون
ولا لف ولا دوران
ولا دموع وشجون
ولا اسيبه فى حروفى
تايه كما المسجون
وابص له فى عيونه
واستعطفه وقوله
سقف لى واكون ممنون
دا الشعر مش يالكم
ولا بكتر حرووف