قلبى اشتاق لك
************
يا غاليه دايما بااشتاق لك
والقلب دايما محتاج لك
وف غربتي قلبي عليكي
بيوصيكي
ماتجرحيش قلب استاهلك
وبلاش تبكي دموع عيني
او تنسيني
د انا اللي متغرب فيكي
لجل عينيكي
وعيوني دايما تندهلك
ومنايا أدوق مية نيلك
وأغنيلك
واكتب من الالم الساكن
جوه ضلوعى
غنوة تقول لك
انى راجع لك
من غيرك انتي هيستاهل
لجله اناضل
واروي له بالدم الطاهر
كل الحاضر
يطرح لي شمس تدفيني
ويصحينى
ف الليل أغازل نور قمرك
مين غيرك انتي يكون ليا
نن عينيا
واكتب له من قلبي كلامي
ويا سلامي
وابدر ف قلبه الحنيه
واهدي له م القلب يا غاليه
نبضى هدية
ويقولى قلبى اهو مفتوح لك
مشتاق تكون من سكانه
وتاخد راحتك
مين غيرك انتي يكون شمعي
نور قنديلي
وبإيده يمسح دمعاتى
ويغني لي
مين غيرك انتي يكون قمري
ونسي ف سهري
ونجوم بتسهر تتمخطر
تشغل ليلي
وهواها تصرخ وتقولى
قلبى إشتاق لك
***********************
رضا ابو الغيط
