قصيدة بعنوان......أصرخ وقول ياقلم
مطموسه ليه كلمتك
طالها الغبار واللوم
وحروف ملاها العجب
ما بتنصر المظلوم
والحبر صابه العفن
بين السطور مألوم
إنطق وقول ياقلم
وأكشف عن المردوم
وأوعاك يهزك ألم
من صرخة المحروم
ده كل شئ إنكتب
فوق الجبين مرسوم
والخوف نهايته العدم
والظلم مش ح يدوم
طول عمرى واقف جبل
بأمتص أى ظروف
بأغزل حروف الأمل
وأكره أعيش ف الخوف
وأنت الطريق والسند
فيك الونس مألوف
صحى الضمير ياقلم
ف عيون بريئة يطوف
يحس كل الوجع
ويبين الموصوف
وأصرخ وقول كلمتك
أوعاك تموت م الخوف
سهم الطريق طواح
مرسوم عذاب وجراح
لو يوم تعيش مهموم
ح تفوتك الأفراح
أرسم حروف النور
السطر يبقى براح
وأوعاك تهاب مغرور
إن جار عليك أوطاح