بحب الشمس والأطفال
وقلبى بيكى متعمر
وبصحى قبل طير الصبح
اصحى الشمس واتشمر
ولما الدنيا تجرحنى
اروح للنيل واشكى له
يرش النور على وشى
يوشوشنى
يسمى فى ودنى ويكبر
يهدينى
الاقى دموعى بتفرفر
يمد إيديه يهدهدنى
ويمسح دمعى من عينى
ويملا لسانى بالسكر
أنا الأسمر
وإنتى السمرا يا بلادى
يا جنة حب أجدادىي
أنا عاشق يا حنيه
يا ضحكة طفل بيرتل
آيات الله بجدية
ولما تزغزغه يضحك
ينور كل بساتينك
تروح الشمس مزوية
وتتخبى
ولم تشوفنى تتدور
أنا الأسمر
حبيبتى غاويه تنسانى
وتقسي عليه تتكبر
عشان عارفاني بعشقها
وعاشق زرعها الأخضر
يا بلدي يا حتة من قلبي
يا دعوة أم محنية
فى فجرية
بحبك..عمرى ما كرهتك
ولاتخوفنى غربانك
ولا تخوفنى جنية
ماهو إنت السمرا يا غالية
وأنا الأسمر
.........رشاد الدهشورى