تامر محمد . فئة عامية
اسم النص . بتهجري ليه
بتهجري ليه
و انا اللي بشوفك السبحة
اللي حاضنة الإيد
و ساعة في إيدي
بترتبلي في المواعيد
فيونكة في شعرك
السايب على كتافك
عروسة في إيد بنات
بتصلي يوم العيد
بتهجري ليه
و نسيتي وعود كانت بينا
و انا معاكي لا كنت بخاف
ما كنتي البحر و المجداف
و كل الدنيا حاسدينا
ما كنتي تملي تحكيلي
آن البعاد دا في الأفلام
و كل شىء معاك بيهون
و لا انتي فجأة سيبتيني
و ناسخة الفيلم بالكربون
و تهجري ليه
و انا الثابت في عالم كله كان مراجيح
و كنت القشة اللي بتنجي في وقت الريح
كنت السكر الدايب في طعم المر
و كنت شجرة بتضلل في عز الضهر
و كنت الضحكة اللي بتجلجل فى وقت الضيق
ازاي تقومي بدور القاضي و السجان
و كل ذكرى بتشهد إني برىء
هربتي كأنك الخيط اللي ساب إسمي
بقيت مجهول و حروفه بقت بتكر
و هجرك كان سهام بتعدي من جسمي
بتسرق أحلى ما في العمر
غريبة في كل احوالك
دا قلبي اللي انتي عذبتيه
لا مرة شاف وريد غيرك
ولا مرة في يوم خانك
ما كنا توأمين بالروح
ملامحي نسخة من شكلك
كأني صورة قدامك
بتهجري ليه و انا مأمن
و بتزيدي الوجع وجعين
يا رب تكوني مرتاحة
و إسمي مش على لسانك
بتهجري ليه
فساتينك و مكياجك في أماكنهم
و كل شىء كما هو
أكيد زعلانين منك
لأنك لما سيبتيني
بينزف جرحي من جوة
و كل حاجة ليها حساب
طبيعي البنت وقت الهجر
بيغضب كل شىء منها
كأن الدنيا بتهينها
و بتزعلها بالقوة
بتهجري ليه
كلمات - تامر محمد