مصر
فئه العامية
الفراق الجميل
آه يا بنتى يا حته منى
وف كل ثانيه بتلازمنى
جالى يوم وهتسبينى
شريط ومر قدام عنيا
لما كنتى بتدواخينى
وبتعمليها فى صغرك عليا
أول ما قلتى كلمه يا بابا
نور الكون كان بيحاوطنى
أول ما مشيتى تاتا تاتا
كنت بهد فى عمرى لاجل تبنى
أول ما مسكتى القلم
كنت طاير م السعاده
كنت بأقولك شدى حيلك
لاجل ما افتحلك عياده
كنت بربيكى بشغف
ما انتى ربايتك عباده
وافتكرت كمان ياروحى
لما مره تعبتى منى
واللهي يومها وجعتى كبدى
ولما كان قلبى بيرقص
يوم نجاحك وبكت عنيا
والله فرحانلك يابنتى
بس دموعي غصب عنى
اصلى متألم لبعدك
حته منى راح تسبنى
كنت بصحا على ابتسامتك
كنت بلقى كل شئ ف الكون عاجبنى
كل شئ ف الكون تاعبنى
كان يسيبنى
أول مره أشوف دموع
ألم الفراق ويا السعاده
والسعاده بتعاتبنى
ربى يسعدك يا بنتى
وتعيشى حياتك سعاده
وتجبيلى واد صغير
يقول يا جدى ويلاعبنى(وائل عمر)