آاااه يا أمي
شوفي حالي بعد منك
م النعيم اصبحت فين
بره سور الجنة مرمي
وسط نار المحرومين
يوم حنانك لما ودع
حلو عمري ف ثانيتين
جوة سيل الدمع ودع
وانتهى بلونه الحزين
سجل المقسوم غيابك
وابتسامتي ف السنين
آه يا امي من فراقك
شق صدري بالحنين
زادي بعد الشهد علقم
كاسي مر المقهورين
بعد منك ف الحياه دي
باقي تاني ليا مين
مهما احكي ياامه عنك
طب هجيب قدك منين
ابجدية توفي حقك
ولا توصف ضمتين
وقت همي . كل همي
كان بحضنك يستكين
كنتي فرحة طايرة بيا
وقت فرحي بجناحين
عز المك كنتي حامدة
شاكرة رب العالمين
حابسة دمعك خوف عليا
ابكي فيهم دمعتين
تمنحيني . الابتسامة
وانتي في عز الانين
عايز اقولك يا حبيبتي
قبل ما اختم كلمتين
حالي زي طير بينزف
بجناحاته المكسورين
جسدي عايش بس روحي
بين أسامي الميتين
جلال معوض أحمد
 |
| الشاعر / جلال معوض (مصر) |