(((( الجزره والنبوت ))))
**************
أنا اللى ناسج
م الليالى ونور القمر
موال
وكان أملى يكون وطنى
ولا اكونش فى زمن
رحَّال
أنا اللى أنينى
فى جبينى
وفوق كتفى
همومى جبال
أنا اللى دموعى
فى ضلوعى
وقلبى حكايته
ما تتقال
****
أنا مادنه على مسجد
وألف صليب على كنيسه
أنا برواز وفيه صوره
وتحت الصوره عنوانى
أنا القديس وانا الراهب
انا أيوب وانا عيسى
أنا إدريس وانا يعقوب
أنا فرعون وانا موسى
أنا الإنجيل وانا القرآن
أنا اللى ملايكة الرحمــن
بتحمينى
أنا عارف أُمور دينى
****
أنا اللى الدنيا بتغربل
سنين عمرى
وانا صابر
أنا المسجون وأنا المسكون
أنا مجنون
بحُب الخير لكُل الناس
وانا شايل فى قلبى آهات
وألف أنين
أنا صرخة غريق بيموت
أنا فرحة رضيع بالثدى
أنا شـطَّـين ومية نيل
وصفصافه
أنا الجزره
وانا النبوت
****
شاعر القريه
فيصل بدر
